මං හැදුවේ මකරෙක්.................

මං හැදුවේ මකරෙක්....

මේ වැඩවසම් ක්‍රමය ගිනිතියන්න.

මේ විකාර ව්‍යුහයන් බිමට සමතලා කරන්න.

ඒත් අද ඒ මකරා හීලෑ වෙලා.

චූටි ගින්දරක් පිටකරනවා

වැඩවසම් පාලකයන්ට සුරුට්ටු පත්තු කරන්න....................

මං හැදුවේ ව්‍යාග්‍රයෙක්...

දූෂිතයෝ නිය පහරින් හූරන්න.

වංචනිකයෝ රෞද්‍ර ව සපාකන්න.

එ්ත් අද ඒ ව්‍යාග්‍රයා හීලෑ වෙලා.

චූටි බංකුවක් උඩ නැගලා.

සර්කස් පෙන්නනවා ජනතාව සතුටු කරන්න..................

මං හැදුවේ තල්මහෙක්...

පුංචියට ඉපදිලා ලොකු වෙන්න.

මහා සාගරයක් වුණත් ජයගන්න.

ඒත් අද ඒ තල්මහ මැරිලා.

ඇගේ මස් ටික දන්දෙනවා,

මුහුදේ ඉන්න අනික් මාලු ජීවත් කරවන්න.................

මං හැදුවේ ශිෂ්ඨාචාරයක්....

කන්න, බොන්න, ජීවත් වෙන්න.

විප්ලව කරන්න, ඒ වෙනුවෙන් මැරෙන්න.

ඒත් අද ඒ ශිෂ්ඨාචාරය වැළලිලා.

චූටි සද්දයක් දානවා.

පාර්ලිමේන්තුවේ විවාද  චූන් කරන්න.................

කසුප් අනුරාධ

.