Sunday, September 29, 2013

බර්ටි මැරැණා ද ..............?



ඇමති කෙනෙකු විය - කැබිනට්
සැප සම්පත් විය - කුල්මත්
ගරු බුහුමන් නැගි - දසතින්
සැරදුනි මැතිණිගේ - බලයෙන්

ඇමති බර්ටි මැරැණෙ එදා
උතුරු පළාතට ගිය දා
ඒත් මැඩම් හිතා බලා
බර්ටි මහඇමති උපදා

නැතත් කැබිනට් ඇමතිකම්
පක්ෂෙ වෙනුවෙන් කැපකම්
එදා බර්ටි නොකළානම්
උතුරු මැද නෑ පක්ෂෙ බලකම්

මහා ඇමති කෙනෙකු විය
පක්ෂයේ බලය නොසෙල්විය
හැකි හැම දහිරිය
දමා රැක‍්කේ ය පක්ෂය

ආවා අලුත් ඡන්ද කාලේ
සහෝදරයින් ඇමති රාළේ
මනාපය ඉල්ලා එවේලේ
දමයි දහිරිය පපා ආලේ

එකට සිටි මහ පුටු දැරූවන්
මූණ නොබලා අහක බැලුවන්
මහා පුටුවට කෙළ හැලූවන්
බර්ටි හළලා සතුටු වූවන්

ගසා ගැට විජ්ජුම්බර
බර්ටි දැරු පට්ටන්තර
උදුර ගෙන පෑ මන්තර
බර්ටි ගැන කීවා කතන්දර

මැරුවා බර්ටි මහ ඇමති
උපද්දා බර්ටි මන්ත්‍රී
දෙවැනි වරටත් මැරුණ බර්ටි
පස්සේ පුටුවට දැම්මා පණනැති

හිටපු ඇමති කෙනෙකු විය.
හිටපු මහ ඇමතිත් විය.
හිටපු මන්ත්‍රි වනවා දිස්විය.
බර්ටි නික්මිය ............... මරණයක් විය.

තුෂාර විතාරණ

.

Saturday, September 28, 2013

පෙනෙන නොපෙනෙන දුරක සිට ..........................


නිදි නැතිව දෙනෙත් යුග ‍
වෙහෙසෙද්දි ..........................
රැය පුරා මුදු තාල
හැඩවෙද්දි ..........................
ඒ හඩට ඔබේ බඳ
නැළවෙද්දි ..........................
මගෙ බඳත් නැළවුණා මුදුතාල
හැඩවෙද්දි ..........................

ඔය දෙනෙත මයෙ නෙතට
යා‍ වෙද්දි ..........................
ආදරයේ සුපෙම් සුව
වැගිරෙද්දි ..........................
මගේ බඳ ඔබෙ බඳට
ළංවෙද්දි ..........................
මන්මත් වුණා මහද මොහොතකට
මුමුණද්දි ..........................

පෙනෙන නොපෙනෙන දුරක සිට
හමුවෙද්දි ..........................
දහසකුත් තරු පොකුරු මා/ඔබ වෙතට
ළංවෙද්දි ..........................
මත් වූ ඔය දෙනෙත් මා සමග
යා වෙද්දි ..........................
සත්තමයි සොදුර ඔබ මගේ මයි
එළිවෙද්දි ..........................

කාංචනා චන්ද්‍රසේකර

.

Friday, September 27, 2013

අහිමි පිය සෙනෙහසට නාඩන් දුවනියේ.....



මා නුවන් තරු කැට සේ යැයි කියලා
අහස ඉකිබිදින බව මා නුවන් ඉල්ලා
ඔබ ලියූ පෙම් කවි මා සම      කරලා
මගෙ සෙනෙහස නුඹ වෙතම ළංකලා

කාලය ගෙවී ඔබ මා රන් හුයෙන් බැදිලා
මා නුවන් තරු කැට නැතිද අද     පායලා
                                      පෙර ඔබ දුන් ප්‍රේමය අද ඔබෙන් සැගවිලා
                                      ඔබ ලියූ පෙම් කවි කෝ මා සම    කරලා

මට හිමි පෙම නුඹ වෙනකු හට  දීලා
එනමුත් ඉන්නම් දූ සුරතල් පානු බලා
ඔබ දුවනිගෙ කිරි සිනා නො දැකාලා
හිදිනු හැකි වේ ද ඔබෙ සිත සනසාලා.....

                                                                          
                                                                                 හසිත හර්ෂණ

Wednesday, September 25, 2013

මහ ඇමතිලා වැඩ අරඹලා .........................



අත් කකුල් පුටු සමතලා කර
බුලත් කොළයක් වඩමලා
හතර අත එය කරක කරකා
හැම ගොනාට ම දික් කළා
ඉහ වහා ගෙන වල ඉහාගෙන
හිතේ හැටියට කා නටන්නට
බලා හුන් ටික එක් කළා ...................

මහ ඇමතිලා වැඩ අරඹලා................


එදා ඉඳ නිල් පෑය ගාගෙන
පෝස්ටර් කටවුට් බැනර්
ලයිට් කණු, ගස්, ගල් පුරාවට
අලවලා බලයට ගෙනා
නිල් ආණ්ඩුවෙ නිල් වසාගෙන
හතර අත කොළ තවරලා
ගමේ මිනිහට ආසනෙත් නෑ
මෙහෙට පැරිෂුට් බස්සලා
පක්ෂෙ මිනිහට ඇමතිකම් නෑ
ඇපත් නෑ ගෙදරට කළා ...................

මහ ඇමතිලා වැඩ අරඹලා ...................


අපේ එකෙකුට කොහෙන් දෙන්නද
ජොබ් උන්ගෙ උන් උස්සලා
ඉන්ටකූලර් උන් ව නග්ගන්
අපිට දුම් දා ගෙන ගියා
පක්ෂෙ හින්දා අපිට තැලූ උන්
අද ගමේ පොරවල් වෙලා
අතින් කාගෙන කඬේ ගිය අපි
බලූ වෙලා අද බලූ වෙලා ...................

මහ ඇමතිලා වැඩ අරඹලා ...................

ඡන්දෙ ගනිනට කලින් හංගපු
ඡන්ද කොළ මළු උර ගනන්
පන්ති අස්සෙන් මතුවෙලා අද
කියනවා මැතිවරණ ප‍්‍රතිඵල
ඔව්වා මෙනවා ද හොඳම එව්වා
හෙට අනිද්දට කරනවා
ගෑණු වැඩ කර කර හිටපු අය
දකී අපි හෙට දාන වැඩ කිඩ
හැමර් මොකට ද මල්ලිලා
ලැම්බොගිනි අපි ගේනවා ...................

මහ ඇමතිලා වැඩ අරඹලා ...................

මැද පළාතේ මහ ඇමතිකම
ලොකුයි වැඩියෙන් අගමැතිකම
පුතා රජ කරවන්න මහ තැන
අත්හරී දිව රාජ සම්පත
පුතේ උඹටත් හැකියි හෙට සිට
මහ රජෙක් ලෙද සැරදෙවන්නට
ඉදින් හොඳ හැටි තෝරලා උඹ
මිනිස් පුළුටක් දකින්නට නැති
හොඳම කන්දක් බලාපන්
ඊට පස්සේ අප්පා වාගේ
කෝටි ගානක් යට කොරාලා
කන්දෙ සුරපුරයක් හදාලා
දෙවැනි අම්බුළු රජ වෙයන් ...................................

තුෂාර විතාරණ

.

Monday, September 23, 2013

කිසිදා හමු නොවන ඈ.........














මා සිත් රූ හා
සමයි.
නෑ ඒත්
ඇගෙ නෙත් ඒ ලෙස
නොවේ.
දිගැසියකි මා සිත
ඇදුණු ඈ.
මැය නම් සමයි
ඇස් කතාව යන ගමන
නෑ..අපොයි
පටු නළලැත්තියකි.
මෑ වේ මා
සිත හා සම ඈ.
දිග ඇස් කතා බහ ගමන දිග් කෙහෙ
ඇති ඈ කේශාවියකි.
නෑ ඇගේ මුහුණ
සිත් නොගනි
දිගැටි මුහුණකි.
මැ නම් ඇයමයි
ඇය ඇයම වී ඇති බවකි.
ලස්සන දිග ඇස් කතා බහ යන ගමන දිග කෙහෙ වටකුරු මුහුණ
ඔව් ඒ ඈමයි
ඈම තමයි
මා කියමි ඈට
මගෙ සිත
ඔව් දැන්ම
මේ දැන්ම
නෑ............!
වෙන්න බෑ..
ඈ අන්ධයි
නෑ!.නෑ!..නෑ!......නෑ!

හසිත හර්ෂණ

Saturday, September 21, 2013

සයිබර් පේ‍්‍රමය ...........................



ඊයේ 
පැයක් කතා කළා.
Skype පැය දෙකයි
ඇයි E mail .........................

අද 
fb පැය දෙකයි
msg සීයයි
Phone එකේ පැයක් ..................

හෙට 
Call එක විනාඩි 30
No msg
රෑට විතරක් GN, Bye............................

සතියකින් පස්සේ
fb එන්නත් වෙලාවක් නෑ
Skype කරන්නේ කොහොමද 3G නෑ
E mail එකක්වත් නැහැ කියලා ඔයා තරහා නෑ නේද ...............................?

කාංචනා චන්ද්‍රසේකර

Friday, September 20, 2013

මම වෙන්න ඉඩ දෙන්න ...................................



ඔබේ මසින් ලෙයින් හැදෙන
පිය සෙනෙහස හොදින් ලබන
මම
ඔබවත්
පියාවත් නොවන වග
තේරැම් නොගත් අම්මේ
මට මම වෙන්න ඉඩ දෙන්න ...............
ඇමතිකෙනෙක්
මන්ත්‍රීකෙනෙක්
ඉංජිනේරුවෙක්
දොස්තර මහත්මයෙක්
එහෙමත් නැතිනම් ඊටත් වඩා
උසස් අයෙක්
ගැන කියන කතා
මම අහන් ඉන්නේ
පිළිකුලෙන් ..........................
මගේ හිතේ රජ කරන්නේ
අළුත් විදිහට හිතන
විනයගරුක හිරි ඔතප් ඇති
අපූරු මිනිහෙක්
ඔහු ගොවියෙක් ද
වඩුවෙක් ද
කම්කරුවෙක් ද
නොදනිමි.
ඒ මිනිසා වෙන්න අම්මේ මට ඉඩදෙන්න ............................

ඩබ්.ටී වීරසිංහ

Tuesday, September 17, 2013

චමින්ද.....



ඔබ කවුද?
සසර ගමනෙහි
මුල මැද අග ‍
සෙයන තවුසෙක්ද?
ගො වෘතය
සුනක වෘතය සමාදන්ව
සුන්යාගාරව
දිවි ගෙවන
සත්‍ය යනු කුමක්දැයි
සොයායන
මව් පිය සොහොයුරන්
අතහැර තැන තැන ඇවිදිමින්                                                       
යැදියෙක් නොවී
සිව්පසය ලැබීමට
ඵල දුන්නත්
පසිදුරන් ඇති මුත්
නිසියාකාර නැති
ව්‍යුහයක් ලබාදුන්
අකුශලය කිමද?
අව් වැසි සුළං හිරිකඩ
නු‍ඹෙ නින්දට නොවේ බාධක
සිව්පසය පිළිගෙන
අතහැර යන්නට
තරම් නුඹ සිත දියුණු වූයේ
කෙලෙසද?
කියන් මා හට.......


ඩබ්ලිව්.ටී වීරසිංහ

යදියා...




පදික වේදිකාවේ යදියෙක්
දෙන්න සතයක් නෑ
අතපාන කොට
පිටුපා යන්නත් බෑ
උපාධි සහතිකය දුන්නා
යදියාට දයා සිතින්
කීයක් හරි ගන්න
නෙත සිදීගිය වියලිදෑස
හැරුණා මදෙසට
ඔලොගුවට අතදමා
කුණු තැවරුණු
පොඩිවී ගිය යමක්
පිරිනැමුවා මට
කීයක් හරි ගන්න
පී.එච්.ඩී
සහතිකය......


ඩබ්ලිව්.ටී වීරසිංහ

Monday, September 16, 2013

සදා ලෙංගතුය ඔබ මගෙන් දුරක වුව .............................



සීත මීදුමක දැවටිලා ඔබ
ළංවුණා මගේ සිහිනයට මොබ
පපුතුරෙහි ඔබේ රැඳුනු උණුසුම
දැනුන සඳ වැටහුණා පියවි බව ..............

සඳේ හිමිකම පතා නුබ ගැබ
හඬා වැටුණ ද ඉකිගසා ගෙන
අහස් හිමි මගෙමයි පතාගෙන
සඳත් වැළපෙයි ලොවට රහසින ........

සඳ බැසයන සඳ අහස හැරදමා
අහස සේම සඳ හඩයි ඉකිගසා
ඔබට සේම මට දැනෙයි හද පුරා
හැරයා යුතු බව සිහින බිඳ දමා ...........

ඔබේ හද උණුසුමට ළං වෙමින් පියවි ලොව
විඳි සුවය පැරදුනා සිහින ලොව උණුසුමට
ගතින් නොවෙතත් සිතින් වුණ සැනසුමට
සදා ලෙංගතුය ඔබ මගෙන් දුරක වුව .............................


කාංචනා චන්ද්‍රසේකර

.

Sunday, September 15, 2013

මගේ දෑස් පින්කර ඇති අපූරුව...................................... හැමර් එකක් දකින්නට තරම්,



නුවර සිට කුරුණෑගලට ගියෙමි.
පෙර නොදුටූ විරූ
අමුතු ම අමුතු හිඟන්නන් රැළක්
දෙපස මහමගෙහි
සිඟමනේ යෙදෙත්,

කුණු දූලි බැඳුනු වැරහැළි වෙනුවට
සුදුම සුදු පිරුවට ඇඳ,
දැලි ගෑ මුහුණු තිබු හිඟන්නන්
පුයර තවරා පිරිසිදු ව,
ළඟින් යනකොට ඔක්කාරෙට ආ
ගත පුරා කොලෝන් පුසුඹ විසිරෙත්........................

හැළුණු මල කෑ දත් තිබූ හිඟන්නන්
කිරිම කිරි පෑ දත් විරිත්තා,
අත්කඩාගෙන බිම වැතිර හුන්
අබ්බගාතයන් සරත අත ඇවිදිත්,
වාරු දුන් සැරයැටිය ආගිය අතක් නැත
පණ ආ අත කනේ ඔබාගෙන
කාටදෝ බුදුසරණ යදිත්.....................

දෑත් එක්කොට හිසනවා
හිස් දෑත් පෙන්වූ හිඟන්නන්
නීල හරිත හෝ රක්ත පෑ ගෑ
කොළ බුරුත්තක් දෙන අපූරුව
”පිනට යමක්” ”කන්න යමක්” කී කටින්
මටත් එකක් දෙන්න කියතී.........................

හිඟන්නන් දැක මග හැර ගිය
මිනිසුන් හැරි හැරී අලූත් හිඟන්නන් නරඹත්,
මගදෙපස හට් ගසා උන් නැගැ
සින්දු කිය කිය හිඟමනේ යෙදෙත්..........................

දෙතුන් දොහකින් මුන්ට හිඟමන් දුන් කල
දෑහැට නොපෙනී අතුරුදහන් වන
මේ හිඟන්නන් ආයේ කවදා දකිත්දෝයි
මිනිසුන් හිත් පුරා මුන්ගේ රූපේ විඳගනිත්..............................

හිටිවනම හෝන් ගසාගෙන
හමුදාව තුවක්කු පෙන්වාගෙන
අඳුරු කළ වීදුරු වලින් වසා
මහ හිඟන්නා රැගෙන ඉගිලූණි............................

ආපසු හැරී බැලූවෙමි.
මමත් පළමු වතාවට
හැමර් එකක් දැකගතිමි
මගේ දෑස් පින්කර ඇති අපූරුව
කුරුණෑගල යන්නට තරම් ..............................

තුෂාර විතාරණ

.
Related Posts Plugin for WordPress, Blogger...