මුඩුක්කුවට එහා ............................

හැකිවෙයි ද බර කරට ගන්නට

හැපි හැපී වැටෙන ජීවිත,

දුප්පත්කමින් පීඩිත මුහුණු,

කුසගින්නෙන් හඩන පොඩිවුන්,

බේබදුකම, නූගත්කම .................. තව ඕනේ තරම්.

හැකිවෙයි ද මේ දේවල් අතික්‍රමණය කරන්නට

දුඹුටු ගැහුණු කොණ්ඩ ගුළියක් බැදගත්,

කර ඉරුණු කමිසයක් ලා ගත්,

කුණු ගොඩින් ඇහිලූ කලිසමක් දැවටූ,

මේ පුංචි උඹට .................

ඔය සිමෙන්ති බාල්දිය එසවූ දාට

කුණු ඇලට බැම්මක් නොව,

අම්මා හිතන මහා මන්දිරයකුත් නොව,

මහ උන්ට ඕන කොන්ක්‍රීට් පාරකුත් නොව,

ක්‍රිකට් ගහන්නට පිට්ටනියකුත් නොව,

උඹට හදන්නට හැකිය

ඔය මුඩුක්කුවෙන් එතෙර වන්නට

පුංචිම පුංචි අඩි පාරක් ...............................

එදාට ඒකෙන් උඹ පස්සෙන් යන්න ඒවි

දුප්පත්, නූගත්, බේබදු, උන් හැමෝම.

ඒ කියන්නේ මුළු මුඩුක්කුව ම.

ඒ දහිරිය හිතට අරන්,

කෝම හරි කරට ගනින් ඔය බර ........... දුවේ

තුෂාර විතාරණ

.